雲茶如人生，人生在學習，智慧在修行。
我沖茶四十年，最鍾意嘅一刻，唔係揭盞聞香，而係第三泡落肚之後——放下杯，等幾秒，喉頭忽然泛起一陣清甜，口腔慢慢滲出津液。嗰下感覺，就好似行山行到攰，坐低吹到一陣涼風。都市人日日對住螢幕，講嘢多、飲水少，喉乾舌燥係常態；我個人嘅體會係，每朝俾自己十五分鐘，慢慢沖一泡茶，等口腔同喉頭得到真真正正嘅滋潤，個人有精神，思緒都清爽啲——呢份滋潤，正係飲茶最貼身嘅養生。
中國傳統養生向來重視「津」呢樣嘢，話唾液係人身嘅寶，身體舒暢嘅人先至自然生津旺盛。反轉嚟講，當一個人長期捱夜、燥熱、緊張，好容易口乾舌燥，飲幾多水都覺得涸。我試過趕工嗰排成日咁，後尾養返成個飲茶節奏——上晝生茶提神，下晝轉溫和茶潤喉，晚飯後得一壺熟茶暖胃——三個月落嚟，成個人都順返。所以茶圈朋友問我飲茶養生由邊度入手，我通常答：由留意自己有冇生津開始。有時我仲會笑住反問一句：今朝嗰杯茶，你生咗津未？身體誠實過任何報告——口中有津，喉頭滋潤，個人自然安落。識得揀茶、識得慢慢飲，就係善待自己嘅開始。
茶有級別高低，人毋分貴賤可享。
講少少茶理。我哋成日將「回甘」同「生津」連住講，其實係兩樣感受：回甘係茶湯入喉之後，苦澀味退卻，喉頭返上嚟嗰陣甜韻——入口先微苦，苦去而甜出，呢個先後先係回甘嘅精髓；生津就係茶湯刺激口腔，令兩頰、舌面不斷滲出津液，喉頭長時間保持滋潤。我教後生仔試回甘有個笨方法：第一泡照平常咁飲，第二泡含住三秒先吞，第三泡吞完唔好急住飲水——三泡落嚟，甜由邊度浮起、幾耐先散，自然分明。茶圈仲有講究嘅分法：兩頰生津、舌面生津，再上一層樓，係飲靚老茶嗰陣成個口腔好似泉眼咁不斷湧水，前輩茶人稱之為「舌底鳴泉」。我第一飲試到呢種感覺，係一位老前輩請我飲佢藏咗十幾年嘅易武，嗰種源源不絕嘅滋潤，我到而家都記得。
回甘生津嘅強弱，亦係評斷一泡茶質地嘅重要標準。茶內含豐富嘅茶多酚、氨基酸等物質，苦澀同甜潤之間轉化得好，飲完先會甘潤持久；若果得苦澀而化唔開，梗係霸氣，喉頭卻涸住唔舒服，咁就唔算好茶。我揀茶入倉，一直都以「喉頭有冇返甜、口腔有冇生津」做第一關——儀器量到嘅係成分，飲落肚嘅先係真章。
人生都係一樣：入口嗰下嘅苦，唔使怕，等一等，甜自然由深處返上嚟。回甘教曉我嘅，唔止係品茶，仲係耐心——世間好多好嘢都要等，茶等得起，人都要學識等得起。今晚不妨都沖一泡，細心感受下嗰陣甜由邊度返上嚟——嗰一刻，你會明白點解我哋咁鍾意雲南茶。
以茶交友，請你品茶。
—
作者：老茶頭·林燊(LamSam)
禪茶莊園 ZENTEA MANOR
天盈供應鏈公司
www.zentea-shop.com
