雲茶如人生，人生在學習，智慧在修行。
我第一次踏足易武古鎮，係一個落住毛毛雨嘅下晝。石板街畀雨水浸得發亮，茶馬古道嘅碎石喺腳下延伸，公家大院嗰棵三百幾年嘅老榕樹靜靜企喺度，樹幹生滿青苔。當地茶農同我講，呢度就係當年易武貢茶進京嘅起運點。我企喺樹下良久，忽然明白：行山尋茶呢件事本身，已經係一種好整全嘅養生——行路出汗、呼吸山間濕潤空氣、放下城市節奏，人未飲茶，心先靜咗一半。
一座易武山，半部普洱史。呢句話喺茶圈流傳好耐，我每次去到都會諗起。乾隆年間，大批石屏人翻山越嶺湧入易武，喺麻黑一帶開園種茶、制茶、做買賣，先進製茶技術隨之傳入，為後來易武貢茶打下咗原料同工藝嘅根基。到清朝中後期，易武出嘅茶沿住古道運上京城，成為皇室貢品；鎮上至今仲掛住「瑞貢天朝」嘅大匾，四個字背後，係一段茶葉被捧上廟堂嘅光榮歲月。
光緒年間，易武嘅經濟實力超過咗倚邦，躍居古六大茶山嘅加工同貿易中心。鎮上茶莊林立：同興號創辦於光緒年間，係易武頭一批成規模嘅老茶莊；同慶號、乾利貞、同昌號各據一方，並稱四強。一八九七年，清政府喺易武設立海關，可見當年茶葉貿易規模有幾宏大。馬幫由易武出發，北面上大理、上昆明、上京城，南面落老撾、落越南、落香港——我哋今日講嘅茶馬古道，易武正係重要起點。
茶有級別高低，人毋分貴賤可享。
講返杯中物。易武茶以「香揚水柔」聞名：香氣揚而不俗，湯水柔而有骨。入口苦澀感低，湯質糯、柔、清、雅，花蜜香由盞底升起，飲完喉頭涼浸浸，回甘生津緩緩而嚟，綿綿不絕。我試過同一餅易武連續沖十幾泡，湯色由金黃轉油亮，層次一路變化——呢份耐泡度，正係好茶嘅底氣。易武嘅陰柔唔係無力，而係柔中帶剛，慢慢細飲先察覺韻味深長。
由養生角度講，易武生茶茶性溫和，唔似啲霸氣山頭咁刺激。腸胃敏感嘅朋友，下晝三點幾沖一泡易武，我個人覺得係好舒服嘅選擇：提神而不燥，飲完胃裡面暖暖地，晚上亦唔怕影響睡眠。茶圈常言「班章為王，冰島為后，易武貴妃、景邁香妃是為雙妃，曼松王子山」——後生時我偏好剛猛茶氣，年紀漸長，反而愈來愈明白易武呢種陰柔之美：定、緩、長。恰似做人做事，唔使搶，時間自然會俾答案你。
易武嘅故事仲有下集。上世紀中葉，手工茶莊一度式微，傳統工藝幾近斷代。九十年代中，一批台灣茶人追住老號級茶嘅蹤跡尋根返嚟，搵到易武，搵到當年編寫茶業史嘅張毅先生，以野放大樹茶做原料、照傳統手工石磨壓制工藝試製新茶，《易武鄉茶業發展概況》呢本小冊子亦隨之面世——斷咗嘅線，就咁樣駁返。我每讀呢段復興史都好感觸：茶如人生，低潮唔係終點，係下一轉嘅伏筆。
皇帝貢茶嘅後花園——呢個花園，種嘅唔止係茶樹，仲有百年興衰同做人道理。我而家每年都會返易武行一轉，飲一杯當季頭春，再帶幾餅新茶返嚟入倉慢慢陳化。你若有緣到我哋莊上，我哋就慢慢斟。
以茶交友，請你品茶。
—
作者：老茶頭·林燊(LamSam)
禪茶莊園 ZENTEA MANOR
天盈供應鏈公司
www.zentea-shop.com
